Cymuned adfer dan arweiniad cymheiriaid

Trawsgrifiad wedi’i olygu o ffilm Recovery Cymru.

Helo, fy enw i yw Keely ac rwy’n gweithio i Recovery Cymru. Yma yn Recovery Cymru rydym yn hyrwyddo gobaith. Trwy ein gweithlu cyflogedig, rydym yn ysbrydoli eraill drwy ein gwybodaeth a’n dealltwriaeth o ganlyniad i’n teithiau adfer ein hunain.

Rydym yn fan diogel ac anfeirniadol lle gall pobl ddod i siarad a theimlo eu bod yn cael eu clywed. Rydym yn credu’n wirioneddol bod gan bawb y potensial i adfer.

Yma yn Recovery Cymru, rydym yn grymuso ein haelodau i fod y gorau y gallant fod. Nid ydym yn gwrando ar ein haelodau yn unig; rydym yn clywed yr hyn sydd ganddynt i’w ddweud, beth maent ei eisiau iddynt eu hunain a sut maent am i’w bywydau edrych. Rydym yn eu helpu i gymryd camau tuag at hynny.

Un o’r pethau rydym yn ei wneud yw grymuso pobl drwy eu tywys drwy adferiad, yn hytrach na gwneud y gwaith drostynt. Mae hyn yn eu helpu i nodi’r bywyd maent am ei fyw, gan roi gobaith, ystyr ac optimistiaeth iddynt.

Rydym yn hyrwyddo ystyr a hunaniaeth drwy annog aelodau i gymryd rhan mewn grwpiau sy’n darparu trefn a strwythur. Rydym hefyd yn cynnig hyfforddiant gwirfoddoli a chyfleoedd gwirfoddoli cymunedol, ac yn annog aelodau i ddilyn diddordebau, hobïau a sgiliau newydd ar gyfer y dyfodol.

Drwy rymuso pobl, nid ydym yn gwneud pethau drostynt. Rydym yn cerdded gyda nhw ar eu taith adfer ac yn eu cefnogi heb wneud y gwaith drostynt, gan ddangos y gall bywyd fod yn fwy ac yn well gyda Recovery Cymru.

Rydym yn annog pobl i ail-fframio eu hunaniaeth mewn ffordd gadarnhaol. Mae pobl yn llawer mwy na’u sylweddau a’u gorffennol. Rydym yn eu hannog i fod yn falch o bwy ydynt, yr hyn maent wedi’i oresgyn a’r hyn maent yn parhau i’w gyflawni.

Mae cysylltiad yn hanfodol i adferiad. Trwy gymorth gan gymheiriaid, rydym yn annog gobaith drwy brofiad byw a phrofiad a rennir. Mae hunan-rymuso ac ymrwymiad yn allweddol i adferiad cadarnhaol.

Fe wnaeth Recovery Cymru fy helpu i ddod o hyd i’m hunaniaeth eto ar ôl i’m hiechyd meddwl gael ergyd galed yn sgil fy swydd flaenorol. Fe roddodd obaith i mi y gall bywyd fod yn dda eto drwy fy helpu i deimlo’n dda amdanaf fy hun.

Mae’r lle hwn yn rhoi ystyr i gymaint o bobl mewn cymaint o ffyrdd. Maent yn gwneud hyn drwy gysylltiad: ar-lein, wyneb yn wyneb, drwy eu canolfannau a thrwy’r bobl sydd yno i’w gilydd.

Mae popeth yn ymwneud â chysylltiad. I ddechrau, mae’n gysylltiad rhwng cymheiriaid, sy’n unigryw ac yn werthfawr. Ond dim ond y sylfaen yw hynny. Mae adferiad yn gam tuag at gymryd eich lle mewn byd ehangach.

Mae’n ymwneud â chymryd ein lle ble bynnag rydym am fod, a meithrin cysylltiad mewn lleoedd a oedd unwaith yn teimlo’n anhygyrch, yn frawychus neu y tu hwnt i’n breuddwydion. Mae Recovery Cymru yn helpu i ehangu cysylltiadau bywyd mewn adferiad, gyda’n cymdogion, ein cymheiriaid, ein dinasoedd a’r byd ehangach.